...ਜਦੋਂ ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਨੇ ਭਾਰਤੀਆਂ ਦੇ ਅੰਗ੍ਰੇਜ਼ੀ ਉਚਾਰਨ ਦਾ ਉਡਾਇਆ ਮਜ਼ਾਕ

ਵਾਸ਼ਿੰਗਟਨ, ਅਮਰੀਕਾ 'ਚ ਨੇੜੇ ਆ ਰਹੀ ਰਾਸ਼ਟਰਪਤੀ ਦੀ ਚੋਣ ਦਰਮਿਆਨ ਸਿਆਸਤਦਾਨਾਂ ਵਲੋਂ ਪ੍ਰਵਾਸੀ ਭਾਰਤੀ ਭਾਈਚਾਰੇ ਦਾ ਮਜ਼ਾਕ ਉਡਾਉਣ ਦਾ ਸਿਲਸਿਲਾ ਰੁਕ ਨਹੀਂ ਰਿਹਾ। ਇਸੇ ਲੜੀ 'ਚ ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਬਿਦੇਨ ਨੇ ਵੀਰਵਾਰ ਰਾਤ ਇਥੇ ਇਕ ਜਲਸੇ 'ਚ ਭਾਸ਼ਣ ਕਰਦਿਆਂ ਭਾਰਤੀਆਂ ਦੇ ਅੰਗ੍ਰੇਜ਼ੀ ਉਚਾਰਨ ਦੀ ਨਕਲ ਲਗਾ ਕੇ ਮਜ਼ਾਕੀਆ ਲਹਿਜੇ ਵਿਚ ਉਸ ਦੀ ਵਰਤੋਂ ਕੀਤੀ। ਉਪ ਰਾਸ਼ਟਰਪਤੀ ਭਾਰਤੀ-ਅਮਰੀਕੀ ਭਾਈਚਾਰੇ ਵਿਰੁੱਧ ਇਸ ਤੋਂ ਪਹਿਲਾਂ ਵੀ ਨਾਂਹ -ਪੱਖੀ ਟਿੱਪਣੀਆਂ ਕਰਦੇ ਰਹੇ ਹਨ। ਇਥੋਂ ਦੀ ਇਕ ਅਖਬਾਰ 'ਚ ਛਪੀ ਖਬਰ ਮੁਤਾਬਿਕ ਉਪ ਰਾਸ਼ਟਰਪਤੀ ਨੇ ਹੈਂਪਸ਼ਾਇਰ ਵਿਖੇ ਇਕ ਜਲਸੇ 'ਚ ਬੋਲਦਿਆਂ ਵਿਦੇਸ਼ਾਂ ਵਲੋਂ ਅਮਰੀਕੀ ਕਾਲ ਸੈਂਟਰ ਦੇ ਮੁਲਾਜ਼ਮਾਂ ਦੀਆਂ ਨੌਕਰੀਆਂ ਖੋਹਣ ਬਾਰੇ ਬਿਆਨ ਦਿੰਦਿਆਂ ਦੋ ਵਾਰੀ ਭਾਰਤੀ ਲੋਕਾਂ ਦੇ ਅੰਗ੍ਰੇਜ਼ੀ ਬੋਲਣ ਦੇ ਢੰਗ ਦਾ ਮਜ਼ਾਕ ਉਠਾਇਆ। ਖਬਰਾਂ ਮੁਤਾਬਿਕ ਉਨ੍ਹਾਂ ਆਪਣੇ ਭਾਸ਼ਣ 'ਚ ਭਾਰਤ ਦਾ ਨਾਂ ਲੈ ਕੇ ਜ਼ਿਕਰ ਕੀਤਾ। ਇਥੇ ਇਹ ਗੱਲ ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਅਮਰੀਕਾ ਦੇ ਇਕ ਪ੍ਰਸਿੱਧ ਟੀ.ਵੀ. ਪ੍ਰੋਗਰਾਮ 'ਚ ਸ੍ਰੀ ਦਰਬਾਰ ਸਾਹਿਬ ਅੰਮ੍ਰਿਤਸਰ ਬਾਰੇ ਵੀ ਮਜ਼ਾਕੀਆ ਟਿੱਪਣੀ ਕੀਤੀ ਗਈ ਸੀ।