Punjab Infoline

ਪੰਜਾਬੀ

Goldy Dhillon: ਅਮਿਤਾਭ ਬੱਚਨ ਨੂੰ ਧਮਕੀ ਦੇਣ ਵਾਲੇ ਗੋਲਡੀ ਢਿੱਲੋਂ ਦਾ ਬਿਸ਼ਨੋਈ ਗੈਂਗ ਨੇ ਉਡਾਇਆ ਮਜ਼ਾਕ, ਕਿਹਾ- ਜਰਮਨੀ 'ਚ ਭਾਂਡੇ ਮਾਂਜਦਾ ਸੀ

18 Nov, 2026 03:32 PM

Goldy Dhillon Amitabh Bachchan Threat Case: ਬਾਲੀਵੁੱਡ ਅਦਾਕਾਰ ਅਮਿਤਾਭ ਬੱਚਨ ਨੂੰ ਕਥਿਤ ਤੌਰ 'ਤੇ ਧਮਕੀ ਦੇਣ ਤੋਂ ਇੱਕ ਦਿਨ ਬਾਅਦ ਹੀ ਗੈਂਗਸਟਰ ਗੋਲਡੀ ਢਿੱਲੋਂ ਆਪਣੇ ਵਿਰੋਧੀ ਧੜੇ ਦੇ ਨਿਸ਼ਾਨੇ 'ਤੇ ਆ ਗਿਆ ਹੈ। ਲਾਰੈਂਸ ਬਿਸ਼ਨੋਈ ਗੈਂਗ ਨਾਲ ਸਬੰਧਤ ਦੱਸੇ ਜਾਂਦੇ ਦੋ ਸਾਥੀਆਂ ਮੰਨਾ ਬਰੈਂਪਟਨ ਅਤੇ ਮਨਦੀਪ ਸਪੇਨ ਨੇ ਗੋਲਡੀ ਢਿੱਲੋਂ ਦੀ ਧਮਕੀ ਨੂੰ ਮਹਿਜ਼ 'ਪਬਲੀਸਿਟੀ ਸਟੰਟ' ਕਰਾਰ ਦਿੰਦਿਆਂ ਉਸ ਦਾ ਮਜ਼ਾਕ ਉਡਾਇਆ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਢਿੱਲੋਂ ਕਦੇ ਜਰਮਨੀ ਦੇ ਇੱਕ ਰੈਸਟੋਰੈਂਟ ਵਿੱਚ ਭਾਂਡੇ ਮਾਂਜ ਕੇ ਗੁਜ਼ਾਰਾ ਕਰਦਾ ਸੀ ਅਤੇ ਉਸ ਵਿੱਚ ਬਾਲੀਵੁੱਡ ਸੁਪਰਸਟਾਰ ਜਾਂ ਉਨ੍ਹਾਂ ਦੇ ਸਟਾਫ਼ ਨੂੰ ਨੁਕਸਾਨ ਪਹੁੰਚਾਉਣ ਦੀ ਸਮਰੱਥਾ ਨਹੀਂ ਹੈ।

ਮੰਗਲਵਾਰ ਨੂੰ ਸੋਸ਼ਲ ਮੀਡੀਆ 'ਤੇ ਜਾਰੀ ਕੀਤੇ ਗਏ ਬਿਆਨ ਵਿੱਚ ਦੋਵਾਂ ਨੇ ਗੋਲਡੀ ਢਿੱਲੋਂ ਦੇ ਅਪਰਾਧਿਕ ਪਿਛੋਕੜ 'ਤੇ ਸਵਾਲ ਚੁੱਕੇ। ਉਨ੍ਹਾਂ ਕਿਹਾ ਕਿ ਢਿੱਲੋਂ ਸਿਰਫ਼ ਸੁਰਖ਼ੀਆਂ ਵਿੱਚ ਆਉਣ ਲਈ ਸਨਸਨੀਖੇਜ਼ ਬਿਆਨਬਾਜ਼ੀ ਕਰ ਰਿਹਾ ਹੈ।

ਢਿੱਲੋਂ ਵੱਲੋਂ ਅਮਿਤਾਭ ਬੱਚਨ ਨੂੰ ਦਿੱਤੀ ਗਈ ਧਮਕੀ ਨੂੰ 1984 ਦੇ ਸਿੱਖ ਵਿਰੋਧੀ ਦੰਗਿਆਂ ਦੇ ਬਦਲੇ ਨਾਲ ਜੋੜਨ ਦੇ ਦਾਅਵੇ ਨੂੰ ਰੱਦ ਕਰਦਿਆਂ ਮੰਨਾ ਬਰੈਂਪਟਨ ਅਤੇ ਮਨਦੀਪ ਸਪੇਨ ਨੇ ਇਸ ਨੂੰ ਲੋਕਾਂ ਦਾ ਧਿਆਨ ਖਿੱਚਣ ਦੀ ਕੋਸ਼ਿਸ਼ ਦੱਸਿਆ। ਉਨ੍ਹਾਂ ਨੇ ਗੋਲਡੀ ਢਿੱਲੋਂ ਨੂੰ ਪੰਜਾਬ ਦਾ ਮਾਮੂਲੀ ਅਪਰਾਧੀ ਕਰਾਰ ਦਿੰਦਿਆਂ ਉਸ 'ਤੇ 'ਚਿੱਟਾ' (ਹੈਰੋਇਨ) ਵੇਚਣ ਅਤੇ ਕੇਬਲ ਤਾਰਾਂ ਚੋਰੀ ਕਰਨ ਵਰਗੀਆਂ ਵਾਰਦਾਤਾਂ ਵਿੱਚ ਸ਼ਾਮਲ ਹੋਣ ਦੇ ਦੋਸ਼ ਲਾਏ।

ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਅੰਮ੍ਰਿਤਸਰ ਵਿੱਚ LGBTQ+ ਇਨਫਲੂਐਂਸਰ ਮਧੂ ਸੰਧੂ ਦੇ ਕਤਲ ਪਿੱਛੇ ਵੀ ਗੋਲਡੀ ਢਿੱਲੋਂ ਦਾ ਹੱਥ ਹੋਣ ਦਾ ਦੋਸ਼ ਲਾਇਆ ਹੈ।

ਜਰਮਨੀ ਵਿੱਚ ਹਮਲੇ ਦਾ ਵੀ ਕੀਤਾ ਜ਼ਿਕਰ

ਜਨਵਰੀ ਮਹੀਨੇ ਦੀ ਇੱਕ ਕਥਿਤ ਘਟਨਾ ਦਾ ਜ਼ਿਕਰ ਕਰਦਿਆਂ ਮੰਨਾ ਬਰੈਂਪਟਨ ਅਤੇ ਮਨਦੀਪ ਸਪੇਨ ਨੇ ਦਾਅਵਾ ਕੀਤਾ ਕਿ ਗੋਲਡੀ ਢਿੱਲੋਂ ਅਕਸਰ ਆਧੁਨਿਕ ਹਥਿਆਰ ਰੱਖਣ ਦੀਆਂ ਡੀਂਗਾਂ ਮਾਰਦਾ ਸੀ। ਪਰ ਜਦੋਂ ਉਨ੍ਹਾਂ ਨੇ ਜਰਮਨੀ ਵਿੱਚ ਉਸ 'ਤੇ ਹਮਲਾ ਕੀਤਾ ਤਾਂ ਸਵੈ-ਰੱਖਿਆ ਲਈ ਉਸ ਕੋਲ ਸਿਰਫ਼ ਇੱਕ ਚਾਕੂ ਸੀ।

ਉਨ੍ਹਾਂ ਦੇ ਦਾਅਵੇ ਮੁਤਾਬਕ, ਗੋਲਡੀ ਢਿੱਲੋਂ ਇਸ ਹਮਲੇ ਵਿੱਚੋਂ ਕਿਸੇ ਤਰ੍ਹਾਂ ਬਚ ਨਿਕਲਿਆ ਅਤੇ ਬਾਅਦ ਵਿੱਚ ਦੇਸ਼ ਛੱਡ ਕੇ ਫ਼ਰਾਰ ਹੋ ਗਿਆ।

ਕੈਨੇਡਾ ਵਿੱਚ ਕਤਲ ਅਤੇ ਗੋਲੀਬਾਰੀ ਦੀਆਂ ਵਾਰਦਾਤਾਂ ਬਾਰੇ ਵੀ ਦਾਅਵਾ

ਦੋਵਾਂ ਨੇ ਇਹ ਵੀ ਦਾਅਵਾ ਕੀਤਾ ਕਿ ਕੈਨੇਡਾ ਵਿੱਚ ਤਿੰਨ ਕਤਲ ਅਤੇ ਗੋਲੀਬਾਰੀ ਦੀਆਂ 20 ਤੋਂ 25 ਵਾਰਦਾਤਾਂ ਨੂੰ ਅੰਜਾਮ ਦੇ ਕੇ ਉਨ੍ਹਾਂ ਨੇ ਹੀ ਗੋਲਡੀ ਢਿੱਲੋਂ ਨੂੰ ਅਪਰਾਧ ਦੀ ਦੁਨੀਆ ਵਿੱਚ ਸਥਾਪਤ ਕੀਤਾ ਸੀ। ਹਾਲਾਂਕਿ, ਉਨ੍ਹਾਂ ਮੁਤਾਬਕ ਬਾਅਦ ਵਿੱਚ ਢਿੱਲੋਂ ਨੇ ਸੋਸ਼ਲ ਮੀਡੀਆ ਪੋਸਟਾਂ ਰਾਹੀਂ ਇਨ੍ਹਾਂ ਵਾਰਦਾਤਾਂ ਦੀ ਜ਼ਿੰਮੇਵਾਰੀ ਖ਼ੁਦ ਲੈਣੀ ਸ਼ੁਰੂ ਕਰ ਦਿੱਤੀ।

ਇੱਕ ਹੋਰ ਗੰਭੀਰ ਦੋਸ਼ ਲਾਉਂਦਿਆਂ ਉਨ੍ਹਾਂ ਗੋਲਡੀ ਢਿੱਲੋਂ ਨੂੰ 'ਪੁਲਿਸ ਦਾ ਮੁਖ਼ਬਰ' ਦੱਸਿਆ। ਉਨ੍ਹਾਂ ਦਾ ਦਾਅਵਾ ਸੀ ਕਿ ਢਿੱਲੋਂ ਆਪਣੇ ਹੀ ਸਾਥੀਆਂ ਨੂੰ ਵਾਰਦਾਤਾਂ ਵਿੱਚ ਫਸਾ ਕੇ ਪੁਲਿਸ ਨੂੰ ਜਾਣਕਾਰੀ ਦੇ ਦਿੰਦਾ ਹੈ, ਤਾਂ ਜੋ ਉਹ ਗ੍ਰਿਫ਼ਤਾਰ ਹੋ ਜਾਣ ਅਤੇ ਬਾਅਦ ਵਿੱਚ ਇਨ੍ਹਾਂ ਅਪਰਾਧਾਂ ਦਾ ਸਿਹਰਾ ਖ਼ੁਦ ਲੈ ਸਕੇ।

Latest News