ਪੰਜਾਬ ਵਿੱਚ ਪੈਟਰੋਲ ਪੰਪ ਡੀਲਰ ₹2,000 ਤੋਂ ਵੱਧ ਦੇ UPI ਭੁਗਤਾਨ ਲੈਣੇ ਬੰਦ ਕਰ ਸਕਦੇ ਹਨ। ਪੰਜਾਬ ਪੈਟਰੋਲ ਪੰਪ ਡੀਲਰਜ਼ ਐਸੋਸੀਏਸ਼ਨ (PADAP) ਨੇ PhonePe, Google Pay ਅਤੇ Paytm ਵਰਗੇ UPI ਪਲੇਟਫਾਰਮਾਂ ਰਾਹੀਂ ਹੋਣ ਵਾਲੇ ਭੁਗਤਾਨਾਂ ’ਤੇ ਲੱਗਣ ਵਾਲੇ MDR ਚਾਰਜ ਦਾ ਵਿਰੋਧ ਕਰਦਿਆਂ ਇਹ ਚਿਤਾਵਨੀ ਦਿੱਤੀ ਹੈ।

ਐਸੋਸੀਏਸ਼ਨ ਦਾ ਕਹਿਣਾ ਹੈ ਕਿ ਪੈਟਰੋਲ ਪੰਪ ਡੀਲਰਾਂ ਨੂੰ ਪਹਿਲਾਂ ਹੀ ਘੱਟ ਕਮਿਸ਼ਨ ਮਿਲ ਰਿਹਾ ਹੈ ਅਤੇ ਪੰਪ ਚਲਾਉਣ ਦੇ ਖਰਚੇ ਲਗਾਤਾਰ ਵੱਧ ਰਹੇ ਹਨ। ਅਜਿਹੇ ਵਿੱਚ UPI ਭੁਗਤਾਨ ’ਤੇ ਵਾਧੂ ਚਾਰਜ ਦਾ ਬੋਝ ਡੀਲਰਾਂ ਲਈ ਮੁਸ਼ਕਲ ਪੈਦਾ ਕਰੇਗਾ।

ਹੜਤਾਲ ਦੀ ਵੀ ਚਿਤਾਵਨੀ

ਐਸੋਸੀਏਸ਼ਨ ਨੇ ਇਸ ਫੈਸਲੇ ਨੂੰ ਵਾਪਸ ਲੈਣ ਦੀ ਮੰਗ ਕਰਦਿਆਂ ਹੜਤਾਲ ਦੀ ਚਿਤਾਵਨੀ ਵੀ ਦਿੱਤੀ ਹੈ। ਜੇਕਰ ₹2,000 ਤੋਂ ਵੱਧ ਦੇ UPI ਭੁਗਤਾਨ ਬੰਦ ਕੀਤੇ ਜਾਂਦੇ ਹਨ ਤਾਂ ਕਾਰਾਂ, ਬੱਸਾਂ ਅਤੇ ਟਰੱਕਾਂ ਸਮੇਤ ਵਪਾਰਕ ਵਾਹਨਾਂ ਵਾਲਿਆਂ ਨੂੰ ਮੁਸ਼ਕਲ ਆ ਸਕਦੀ ਹੈ।

ਖਾਸ ਤੌਰ ’ਤੇ ਲੰਬੇ ਰੂਟ ’ਤੇ ਜਾਣ ਵਾਲੇ ਉਹ ਵਾਹਨ ਚਾਲਕ ਪ੍ਰਭਾਵਿਤ ਹੋ ਸਕਦੇ ਹਨ, ਜੋ ਪੈਟਰੋਲ ਜਾਂ ਡੀਜ਼ਲ ਦੀ ਟੈਂਕੀ ਫੁੱਲ ਕਰਵਾਉਂਦੇ ਹਨ।

ਪੰਜਾਬ ਵਿੱਚ ਕਰੀਬ 4,104 ਪੈਟਰੋਲ ਪੰਪ

ਪੰਜਾਬ ਵਿੱਚ ਕਰੀਬ 4,104 ਪੈਟਰੋਲ ਪੰਪ ਹਨ। ਅਗਸਤ 2026 ਦੇ NPCI ਦੇ ਅੰਕੜਿਆਂ ਦੇ ਆਧਾਰ ’ਤੇ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਸੂਬੇ ਦੇ ਪੈਟਰੋਲ ਪੰਪਾਂ ’ਤੇ ਰੋਜ਼ਾਨਾ ਲਗਭਗ 11 ਤੋਂ 12 ਲੱਖ UPI ਲੈਣ-ਦੇਣ ਹੁੰਦੇ ਹਨ, ਜਿਨ੍ਹਾਂ ਦੀ ਕੁੱਲ ਰਕਮ ਕਰੀਬ ₹65 ਤੋਂ ₹70 ਕਰੋੜ ਦੱਸੀ ਜਾ ਰਹੀ ਹੈ।

₹5 ਚਾਰਜ ਨਾਲ ਰੋਜ਼ਾਨਾ ₹5.5 ਤੋਂ ₹6 ਲੱਖ ਵਾਧੂ ਖਰਚ ਦਾ ਅਨੁਮਾਨ

ਅਨੁਮਾਨ ਮੁਤਾਬਕ ਰੋਜ਼ਾਨਾ ਕਰੀਬ 10 ਫੀਸਦੀ ਗਾਹਕ ਹੀ ₹2,000 ਤੋਂ ਵੱਧ ਦਾ ਤੇਲ ਭਰਵਾਉਂਦੇ ਹਨ। ਜੇਕਰ ਹਰ ਅਜਿਹੇ ਲੈਣ-ਦੇਣ ’ਤੇ ₹5 ਚਾਰਜ ਲੱਗਦਾ ਹੈ ਤਾਂ ਡੀਲਰਾਂ ’ਤੇ ਰੋਜ਼ਾਨਾ ਲਗਭਗ ₹5.5 ਤੋਂ ₹6 ਲੱਖ ਦਾ ਵਾਧੂ ਖਰਚ ਆ ਸਕਦਾ ਹੈ।

ਇਸ ਹਿਸਾਬ ਨਾਲ 30 ਦਿਨਾਂ ਵਿੱਚ ਇਹ ਰਕਮ ਕਰੀਬ ₹1.65 ਤੋਂ ₹1.80 ਕਰੋੜ ਤੱਕ ਪਹੁੰਚ ਸਕਦੀ ਹੈ।

ਸਰਕਾਰ ਤੋਂ ਫੈਸਲੇ ’ਤੇ ਮੁੜ ਵਿਚਾਰ ਦੀ ਮੰਗ

ਐਸੋਸੀਏਸ਼ਨ ਨੇ ਸਰਕਾਰ ਤੋਂ UPI ਭੁਗਤਾਨਾਂ ’ਤੇ ਲੱਗਣ ਵਾਲੇ ਵਾਧੂ ਚਾਰਜ ਸਬੰਧੀ ਫੈਸਲੇ ’ਤੇ ਮੁੜ ਵਿਚਾਰ ਕਰਨ ਦੀ ਮੰਗ ਕੀਤੀ ਹੈ।